لوزه هتجننى

هاى يا جماعة ... انا عامله البوست ده مخصوص عشان اشهدكم على الست لوزه هانم اللى ليها خمسين سنة موعدانى انها هتعمل بوست هنا فى البلوج ومعرفش ايه اللى شاغلها عننا بالظبط مع انها خلصت امتحانات من زمان ... يظهر بقى اللى على على والباشا مش فاضيلنا ... وانا بقولكم الكلام ده دلوقتى عشان انا عارفه انكم اكيد زعلانين منى لانى سايبه المدونة مهجورة .. وخيوط العنكبوت ملت الدنيا والهلوس كتر .. لكن المفروض اللى تزعلو منها لوزه .. لانها هى اللى عليها الدور تعمل بوست .. اتصرفو معاها بقى ... قشروها .. كلوها .. اللى انتو عاوزينه

وانا والله مش بإيدى التأخير .. انا متبهدله فى الشغل .. متبهدلة بمعنى الكلمه .. وبالذات فى الحر ده .. انا مش عارفه يوم القيامه لما الشمس هتبقى قريبه مننا قوى هنعمل ايه ... ربنا يستر

والواحد كل يوم بيشوف مآسى فى المستشفى دى تحسسه انه ماكنش عايش فى الدنيا دى قبل كده

يعنى مثلا فى مره من المرات .. دخلت علينا واحده ف الاستقبال .. عندها حوالى اربعين سنه .. ومظهرها كويس الى حد ما .. ومتعلمة ... المهم كانت طالبة تقرير طبى على جروح وكدمات على وشها وجسمها عشان تبلغ البوليس .. فالمهم كنا بنعاين الجروح وانا كشفت عليها بنفسى ... عندها كدمات شديده فى عنيها الاتنين .. وف دراعها وضهرها وصدرها .. يعنى من الاخر اتعرضت للضرب الشديد .. وعامله جبيره على دراعها التانيه

المهم اتضح ان الست دى كانت جت قبل كده وقالت انها اتعرضت للضرب فى الشارع واتسرقت شنطتها ومعملتش بلاغ .. لكن رجعت تانى عشان تعمل بلاغ .. غيرت رأيها يعنى .. حاولنا نعرف منها الحقيقه بكل الطرق ولكن هى كانت بتتهرب .. المهم من هنا لهنا عرفنا الحقيقة اللى انا .. عن نفسى .. شعر راسى وقف منها ... اللى ضربها ابنها

بس تعرفو يا جماعه .. احنا مش اول مره نسمع عن ابن بيضرب امه .. بنشوفها فى البرامج والمسلسلات والافلام .. لكن صدقونى .. على ارض الواقع .. لما تشوف الحاله وجها لوجه .. الامر بيختلف تماما

وهى الست فى الاول مرضيتش تعمل بلاغ عشان مش عاوزه تسجن ابنها .. وكانت ساعتها مروحه من المستشفى بعد ما عملت الجبيره .. ولما وصلت بيتها .. ابنها طردها وقالها مالكيش قعاد فى البيت ورماها ف الشارع ... فاضطرت .. بقلب مكسور .. تعمل بلاغ على ابنها لانها مش لاقيه مكان تنام فيه

الحقيقه كلنا بكينا عليها ... فعلا .. علامه من علامات الساعة .. شئ لا يصدقه عقل ولا يقبله منطق ولا دين .. شئ مثير للشفقه على الام وف نفس الوقت على الاشمئزاز من الابن اللى هو مش بنى آدم اصلا .. ولا حتى حيوان .. انا كده هظلم الحيوان لو قلت عليه حيوان

بس انا مش مصدقه على فكره ... اكيد الابن ده مختل عقليا .. مفيش حد هيقدر يقنعنى انه سليم

المهم انا مش عاوزه اقلبهالكم نكد كده ... لازم حته فرفشه فى الآخر .. ماهو الواحد فى المستشفى دى مش بيشوف مآسى بس .. بيشوف مواقف وطرائف

فى مره كنت فى قوضة الغرز .. خلصت شغلى وحطيت غيار وبلاستر ع الجرح وخرجت بره القوضه وف ايدى بكرة البلاستر .. المهم لاقيت واحد طويل عريض قد ابويا .. بيقوللى .. ادينى حتة بلاستر

المهم قلتله ليه؟؟ .. قاللى عاوزها ف حاجه .. قلتله حاجة ايه؟؟ وطلعت الغلاسه عليا ومرضتش اديله حاجه الا لما يقوللى ليه .. المهم قاللى .. عشان الجوزة

طبعا انا قعدت حوالى ثانيه ونص فى ذهول وبعدين قلتله .. بقى انت جاى المستشفى وبتكلم الدكتوره وبتطلب منها بلاستر عشان الجوزه؟؟ ده انا اروح النار لو اديتك .. وسبته ومشيت

والطريف ان مره جت واحده دكتوره فى الجامعه استقبال الحوادث عشان عاوزه حد يخلعلها الحلق عشان مش عارفه تخلعه

مره دكتور زميلنا .. بعد شغل 48 ساعة متواصل .. دخل يريح شويه .. وكان سمح لعيان انه ياكل حاجات خفيفه بعد ما عمل العمليه .. قاله كل زبادى .. وبعدين دخل نام .. جم اهل العيان وقعدو يرزعو الباب على الدكتور .. كانو هيكسروه .. وصاحبنا صحى من احلاها نومه وافتكر ان فى مصيبه حصلت .. المهم قالوله .. نجيب زبادى عادى .. ولا بخيره؟؟

مره واحد جالى استقبال الحوادث .. كان عاوزنى اشحنله الكارت عشان مش عارف يشوف الارقام

انا مش راضيه اعلق .. سايبالكم انتوا التعليقات

والى اللقاء فى حلقه قادمة .. واطير اجيبهالكم من كل انحاء الدنيا .. والسلام عليكم ورحمة الله وبركاته