النهاردة كانت عندى نبطشية صباحيه نص يوم .... وكالعادة طلعت سكن الطبيبات ولبست البالطو الابيض .. وحطيت النوت بوك ف جيبى والسماعة حوالين رقبتى ... وبصيت نظرة اخيرة قبل ما امشى على المرايه وانا بقول فى نفسى .... يارب استرها
قفلت الباب .. ونزلت السلالم حوالى دور .. ساعتها اكتشفت انى نسيت القلم فى القوضة .. حتى انى اضطريت اطلع تانى عشان اجيبه ... لان والواحد فى المستشفى بيشتغل .. حاجتين لو مش معاه يبقى كأن عنده شلل رباعى .. هما القلم .. والموبايل
المهم لما رجعت اخدت القلم ونزلت مره تانى .. خطر على بالى خاطر مش عارفة حد فكر فيه ولا لأ
هل نسيانى للقلم ورجوعى القوضة عشان اجيبه .. كان صدفة؟؟؟
تعالو نحسبها .. على ما اكتشفت انه مش معايا .. ورجعت اجيبه .. ونزلت تانى .. ممكن تكون اخدت حوالى دقيقة ..ده معناه ان فى فرق دقيقة بين حالى لو كان معايا القلم من الاصل .. وحالى لما مكانش معايا وجبته
انتو عارفين دقيقة تأخير معناها ايه؟؟؟ ... معناها انى كان ممكن اقابل فيها ناس وانا ماشيه .. ممكن حد يشوفنى ويعمل معايا موقف يضايقنى .. والدقيقة التأخير دى صرفت عنى اذاهم ... لما نزلت كانت العامله بتنضف ومغرقه الدنيا ميه ... فى الدقيقه دى كان ممكن الميه دى تكون فى مكان معين بحيث اتزحلق فيها واقع .. لكن الدقيقة صرفت عنى الضرر ده
ممكن فى الدقيقه دى فى ناس كانت هتعدى قدامى .. بسبب الدقيقة التأخير قدر لى انى ماشوفهمش لحكمة يعلمها الله وحده
ساعتها توصلت للحقيقة ... ان مافيش حاجة اسمها صدفة
كل شئ مرتب ومنظم من الله سبحانه وتعالى .. لحكمه يعلمها وحده .. ولو كنت اعلم الغيب لوجدت ان الدقيقة دى صرفت عنى مليون حاجه كانت هتسببلى الضرر والضيق
فوصلت لحقيقه .. وعباده ... احنا كلنا بنقولها .. لكن مبنحسهاش
الحمد لله .. الحمد لله على كل خطوه .. الحمد لله على كل نفس
اللهم لك الحمد حمدا كثيرا طيبا مباركا فيه .. ملئ السماوات وملئ الارض .. وملئ ما بينهما .. وملئ ما شئت يا ربنا من شئ بعد
حسوها يا جماعة .. واحمدو الله على كل شئ .. واللى حصلتلو حاجه وحشه يحمد ربه .. ممكن .. اكيد تكون الحاجة دى صرفت عنه حاجه اكبر واكبر .. هو اللى خلقنا وعالم بينا اكتر مننا
واخيرا .. دعواتكم ليا يا جماعة .. عشان الواحد فى المستشفى دى بيشوف مآسى تكفى بلد .. زائد روتين الشغل والتعب والحر
ادعولى تحصلى حاجه حلوه .. حتى لو دعتولى ان السما تمطر بنبونى .. انا موافقه
ههههههههههههههههههههههه
سلام
