Badr& Anees.. .

خمسة رغى

كح كح كح ... اووووووووح .. ياساتر.. كل ده تراب؟؟

طبعا اكيد .. محدش هوب ناحيت المدونة سبع شهور .. ياااااااااااه .. سبع شهور ؟؟ عدو زى الهوا . كأنى كنت لسه بكلمكم امبارح
بس برضه مش هقول وحشتونى .. ولا هقول اشتقتلكم .. لانكم طول الوقت ع البال وع الخاطر.. عمرى ما نسيتكم
عمرى ما نسيت ايامى الحلوه اللى كنت بقضيها معاكم .. تعليقاتكم وردودكم .. ولوزه الحلوه وحشتنى مناقرتها معايا .. والفضايح اللى بنعملها ع الهوا ..ههههههههه
انا زى اى حد .. استلم وظيفه .. الشغل اخدنى .. اخدنى لبعيييييييييييد .. لدرجه ابتديت فيها احس بالاكتئاب .. وخصوصا مجال الطب .. يااه .. انا مكنتش فاكره كده ابدأ .. اتحولت لمواطن مطحون فظيع .. مش عارفه ارفه عن نفسى .. مش عارفه حتى اشم هوا .. زى السجن .. زى الجيش .. لأ تصدقو .. الجيش اهون
المهم ادركت فى النهايه ان صحتى فوق كل شئ .. والحمد لله بقدر الامكان قدرت اظبط امورى .. يعنى السبع شهور اللى فاتو دول ممكن يعتبرو دوامه مؤقته .. او مطب كبير وعدى وادينى رجعتلكم تانى والحمد لله
انا محضرتش كلام معين اقوله .. انا قلت اعدى ارغى معاكم شويه
عارفين .. ممكن الواحد يرفه عن نفسه بطرق كتيره قوى .. حتى ف بيته من غير ما ينزل .. انا كل يوم بالليل اقف فى البلوكنه واتفرج على الاولاد وهم بيلعبو كوره ف الشارع .. منظرهم جميل قوى .. ساعات فجأه تلاقى حركات وتمريرات وترقيصات رهيبه .. ميعملهاش حتى لوناردينهو .. حتى لو قلت للى عملها يعملها تانى مش هيعرف .. بتبقى حاجات وليدة اللحظه .. ساعات الواحد بيتفرج على ماتش ف الشارع احسن بكتيير قوى من ماتش على التلفزيون بيلعبو فيه المع النجوم
وده خلانى افتكر حاجه تانيه .. الناس اللى بتلعب فيفا ف البلاى شتايشن .. بتغاظ منهم قوى .. ايه الفايده يعنى انى اقعد بالساعات اتحكم فى واحد وهو بيشوط الكوره .. انا حاسه ان اللى اخترع لعبت الفيفا دى اخترعها للمعوقين .. اللى عمره ما هيلعب كوره ف حياته وبكده بيعوض حاجه مش بيقدر يعملها
لكن لما واحد طويل عريض يلعب فيفا بالساعات .. شئ عجيب طبعا .. ما يهز طوله كده .. ويلبس الكوتشى ويمسك الكوره ويجمع اصحابه وينطلق .. بجد اجمل وافيد
متفهمونيش غلط .. انا بحب البلاى شتايشن جدا .. لكن فى كراش .. تومب رايدر .. العاب حربيه .. حاجات يعنى منقدرش نعملها . لكن الكوره طبعا بتبقى احلى على ارض الواقع
غير العيال اللى بيلعبو كوره .. فى شئ عجيب جدا بيحصل كل يوم وعاوزاكم تفكرو معايا تفسيره ايه
البلوكنه بتبص على صيدليه .. كل يوم فى ساعة متأخره من الليل .. بعد ما الصيدليه دى تقفل .. واحد بييجى يفتحها ويدخل ويقعد فتره قصيره وبعدين يطلع يقفل الصيدليه ويمشى .. انا فى الاول افتكرته ممكن يكون ناسى حاجه .. لكن لاقيت الحكايه بتتكرر كل يوم .. وف نفس التوقيت .. اموت واعرف ايه اللى بيعمله
وغير اللى بيعمله .. انا مستغربه على تظبيطة التوقيت كل يوم .. غريبه مش كده؟؟؟
عندنا كمان جارنا اللى ساكن قدامنا .. عنده عاده غريبه جدا .. بيطلع اكياس الزباله بره البيت فى تمام الساعه الواحده بعد منتصف الليل .. كل يوم بقاله سنين .. مش عارفه ازاى وليه مواظب عليها بالظبط .. ممكن تكون حاله نفسيه ؟؟ الله اعلم ههههههههههه
يارت كل حاجه تتعمل مظبوت زى اكياس الزباله .. مكانش هيبقى ده حالنا
كلها حاجات بسيطه صغيره لكن ممتعه .. لو كل واحد فينا خلى حياته كلها مغامرات .. حتى وهو ف بيته .. ويخرج عن الروتين . اكيد هيبقى احلى
طولت عليكم فى الرغى .. دى مبقتش خمسه رغى .. دى بقت خمسين رغى ..هههههههههههههههه
سلام