اجمل ما فى الخطوبه العزومات على الغداء والخروج والفسح .. لذلك .. يجب على كل آنسه لو ربنا يعنى فك عقدتها واتخطبت التركيز شويه فى طريقه الاكل قبل الزواج وخاصة فى عزومة خطيبها لو كانت عايزه تشوف مطاعم تانى بعد الزواج .. خدى او ديرى بالك من النصايح دى وابقى ادعى لنا
الشوكة والسكينه : أوالفوركيت والموس ..لازم تعرفى كويس ربنا يهديكى ان الشوكة لازم تتمسك من إيدها من الطرف يعنى مش من الوسط ولا من البوز وكفاكى افلام الرعب اللى بتتفرجى عليها .. مش خنجر هو
الخبز: اوعى تفضحينا وتقطعى الخبز بأسنانك أو تقطعيه نصفين بإيدك وكا نصف وابلع .. الخبز يا ماما يتقطع بالسكينه فى الطبق وبعدين تاخدى قطعة وتاكليها بالعافيه .. قال يعنى نفسك مسدوده
الحساء: أبوس رجلك .. البند ده مهم جدا .. الحساء يتشرب من غير صوت خالص ومن غير النفخ فيها زى القهوجى اللى بينفخ حجر الشيشه للزبون .. أهم شيء بالملعقة وبدون صوت حتى لو كانت مولعة نار من غير صوت .. ومتنسيش تسيبى ثلث الطبق مليان
الأرز: الارز طبعا بيتاكل بالشوكة .. هى دى المفاجاة .. اياكى تمدى ايدك على الملعقة ومن الطبق وتعبى .. الأرز بالشوكة كأنك بالظبط بتبوسيه مش بتاكليه
السمك: او الحوت .. مشكلة كبيره شوية .. بس ركزى معانا عشان تعرفى كيفيه فصل اللحم عن الشوك .. تقطعى اللحم من المنتصف بالطول بعدين افردى اللحم على الناحيتين ولا تقلبى السمكة .. من غير فضايح شيلى سلسله الظهر بالموس والفوركيت وحطيها فى جنب الطبق وكلى النص التانى .. ولا أقولك .. بلاش الفيلم الهندى ده كله وقولى ماحبش السمك واخلصى وخلصينا
المكرونة الاسباجيتى: أو الباستا .. تتلف على طرف الشوكة لحد ما تخلص وبعدين فى هدوء ومن سكات تاكليها وبلاش حكاية الشفط دى
الجمبرى: أو الشرمب او الروبيان .. يعنى لو كنت تعرفيه .. أول ما ينزل الطبق اللى فيه جمبرى بصى له كده من تحت لتحت كأنك مليتى من كتر اكله .. اتنهدى بالراحه وقولى: ايه ده ؟ هو الجمبرى ورايا ورايا .. المهم تروحى قاطعه الرأس بالشوكه وارجوكى انسى خالص قصة الشفط والمص دى قدام خطيبك
الفاكهة: لو فيها بذور اتاكدى انك تطلعيها الاول بالشوكة وتحطيها على جنب
النهايه: أول ما تنتهى من الاكل تحطى ايدك على بطنك .. رغم ان كل العصافير جواها بتزمر من الاصناف اللى شمتيها .. وتقولى مش قادره ..مش ممكن .. اول مره آكل كده قدامى اسبوع على ما افكر آكل تانى وبعدين تمسكى الفوطه او المنديل وتروحى ماسحه بيها فمك كأنك بتبوسيها وبعدين استأذنى عشان تروحى تعدلى مكياجك .. أول ما تدخلى تروحى مطلعه من شنطة ايدك سندويتش الفول المتين وسندويتش الفلافل مع زيتون وبصل .. واديها بالهنا والصحة عشان تقدرى تواصلى وتصلبى طولك وانت راجعة البيت
