تاج من لوزه التحفة اللى مش هتسيبنا ف حالنا

بسرعة بديهتها وذكائها المعهود .. لوزة ردت عليا بتاج ربنا يوفقنى فيه واجاوب على اسئلته .. بصوا على التاجين وشوفوا العلاقة ما بينهم ... نبدأ وأمرى لله

هستخدم كلمة (أسوأ).. أسوأ بوست قريتيه؟

نصلح الكلمة .. اسوأ بوست عملته .. بتاع الوحش الخرافى العجيب .. كان عندى حالة اكتئاب لما عملته

أسوأ بلوج دخلتيه؟

الحمد لله كل البلوجات اللى دخلتها كانت حلوه .. بس انا عامة اكره التشاؤم .. ومن الآخر اى بلوج فيه موضوعات تشاؤمية هى ف سكه وانا من سكه

لو رايحه مكان مزعج .. زي زياره لحد متحبهوش " واحد خنقه ..".. أو واجب رسمي غصبا عنك ... مين أول شخص تحبيه يروح معاكي ..؟؟ مين ده الي امه دعيه عليه ..؟؟

عندى اجابتين: بجد: احتمال هروح وحدى لانه واجب او امر مزعج مش هحب حد يشاركنى فيه

بهزار : هفكر فى لوزة لأن اى مكان مزعج محتاج لواحدة مزعجة..هههههههههه

تحبي الناس متقلش عليكي ايه ..؟؟

كذابة او متكبرة .. اكره صفتين ف حياتى

لو انت عربجي تحبي تكري عربيتك بحمار والا بغل هههههههههه ؟؟

مش من مستوايا ارد على سؤال زى ده

لو كنت بني آدمه بخيله جلده .. " خليل البخيل مثلا " ههههههه وعزمتى اصحابك على طبعا ولا حاجه ... وبعد كده وهما طلعين قلتلهم يدفعو تمن اكلهم .. الي هوه ولا شيء وبعدين محدش دفع يا جلده تعملي ايه ..؟؟
اكشن خليل البخيل والنِّعْمِه ...

كالعاده .. هضطر .. وبكل صعوبة .. انى اطلع كام جنيه من اللى معايا .. واغرقهم بدش من دموعى

وهديهم للراجل مبلولين .. كالعاده .. ههههههههههههه

لو اتخطبتي يا ستي ويلا بسرعه لو سمحتي خلصينا الدور عليكي تقريبا .. تحبيني اجبلك هديه شكلها ايه .. متختاريش حاجه غاليه لو سمحتي ...؟؟
وعموما كله على النوته ...

ياستى ... انا مش عاوزة غير خلقتك فى الحفلة ... مش عاوزه منك حاجه تانيه

اخرمره بكيتي فيها من قلبك ... ده اذا كان عندك قلب من الاصل ... سورييييييييي ..؟؟؟

لما عمتو .. الله يرحمها

وانا عندى قلب يا تحفه

لو انت قاعده انت وصحباتك شغاله نم على الدكتور" منك لله طبعا مش نويه تبطلي العاده ده .." وطلع واحد من الي وققه بتنمي معاهم ابن الدكتور تعملي ايه ... طبعا كبسه محترمه ..ههههههه؟؟ " يا شماتت ابله زازا فيك "

مين ابله زازا دى ؟؟ .. المهم .. هسقط فورا وهتشاط من الكليه .. من قبل ما أكمل كلام

اكثر برنامج بتكرهي في التلفزيون ..؟؟ وكل متشفي تشتمي المخرج .. اصلي عرفاكي غويه شتايم ..

ستار أكاديمى ... لأنه تافه وسخيف

اكثر ممثل بتحتقريه ..؟؟؟

الشحات مبروك ... انا مش مصدقه انه من عداد الممثلين

اكثر اغنيه بتكرهيها ...؟؟؟

أى اغنية هابطة مالهاش معنى .. واللستة طويله للأسف

اكثر 3 حاجات بتحبيها في حياتك ...؟؟

الشيكولاتة .. والضحك .. وأفلام الكرتون

لو وحده صحبتك جدا كانت بتكره شخص واتقدملك ... تضربي بالجزمه ..؟؟؟

جزمة ايه .. ايه اللى انت فيه ده .. هعطيه فرصة .. ممكن يكون كلامها غلط .. وساعتها مش هيهمنى رأى حد

اكثر شخص نكدي عرفتي في حياتك ...؟؟؟

هانى شاكر .. ومصطفى كامل

ما تحتقري على وجه السويه ..؟؟

جورج بوش

اخر مره اتكلمتي عدل مع حد ... مش هتبطلي العاده ده .. دوله بشر يا بنتي ..التواضع كويس .؟؟

انا بتكلم عدل على طول يا غلسه .. ماعدا انت .. انت حاله خاصة

لو معاكي جردل زباله .. اول شخص تفكري تدلقيه فوق راسه مين ..؟؟

واحدة ف بالى .. ههههههههههههههههههههههه

اكتر اكله بتقرفي منها ... ؟؟ يعععععععععع

مع احترامى ... السبانخ .. واى حاجة عليها نعناع أخضر

مهلس ودجال بتكرهي تشوفي خلقته ..؟؟

واحد مش عارفة اسمه ايه .. بيفسر أحلام فى التلفزيون .. منه لله

اخر مره كسبتي فيها شخص عدل طبعا ده من النوادر عندك ..؟؟؟

طبعا .. كسبت يوما وليندا .. احسن ناس

لو معاكي شوية تقاطيع تدخلي فيهم ازاي ... نيم يم ومعاها شرهان جائع ..؟؟

مدقتهاش اصلا .. حرام عليكى الناس هيفتكرونى سمينه

لو فلستي وبقيتي على الحديده تعملي ايه ...؟؟

ارفع ايدى للسما واقول يارب

كنت خيبانه في المدرسه قولي قولي ولا تتكسفي .. اصلا عرفه حتى كانو العيال الي معاكي بيسرقو حجتك .. لان من خبتك مكنتيش بتعرفي تتكلمي عربي اصلا ... مش فالحه الا في الياباني بتاعك ... اخي عليكي ... كسفتينه قدام الخلق ..؟؟

فشر يا ماما ... روحى بس انت خليكى فى الهندى بتاعك .. واللى مفهمش اول كلمه ... انا كنت شاطرة فى المدرسة .. فى اللعب ههههههههه

بتمسحي سلم الكليه كام مره في اليوم وبيدوكي عليه كام ههههههههههه ؟؟

انت معندكيش دم

اكتر ماده بتكرهيها في حياتك ...؟؟؟

الجغرافيا

احلى ماده درستيها ..؟؟؟

فى المدرسة .. الفيزياء والرياضيات

فى الكلية .. الهستولوجى والجراحة

ازفت شخصيه كرتونيه ..؟؟

انيس .. هههههههههههههه

اول حاجه عملتيها النهرده اول مصحيتي ..؟؟

دخلت غسلت وشى .. ايه الاسئلة الغريبه دى

اكتر لبسه بتكرهي تلبسيها ...؟؟

البلوزات اللى ليها أكتاف .. بيقولو عليها ايه؟ .... اوبليتات ... يع يع يع

اخر مره اتصدقتي بفلوس لوجه الله ... عرفاكي مبتعمليهاش يا بنتي ليه بس حرام عليكي ده فيها اجر انت من كتر مبتقري قصص خليل البخيل بقيتي زيه الباين ..؟؟

دى حاجة بينى وبين ربنا

أكثر اداة بتكرهي تستخدميها ..؟؟

الابره ... مفيش مره مسكتها فيها ومتشكتش

اكثر حاجه بتكرهي تعمليها ..؟؟؟

المذاكره .. أأأأأأأأأأأأأأأأأأأأأأأأأأأأأأأأأأأأأأه

وقت التهريج مين اكتر شخص تحبي يكون معاكي ..؟؟

انت والتحف

ازفت لغه مرت عليكي ..؟؟

الهندى ههههههههههههههههه

اوحش منظر شفتي في حياتك ..؟؟

خط وحش او حاجه غير مرتبة

اوحش ريحه شمتيها في حياتك ..." اجاوب على السؤال ده ريحة ابو كلونيا هههههه" ..؟؟اوعي تقولي لهادي ...

ريحة فوطة مبلولة ومركونة

وريحة ايدى وانا ماسكة المفاتيح

اتعس لحظه في حياتك ..؟؟

لما حد يفهمنى غلط ويكون عزيز عليا

اكثر حيوان بتكرهي ...؟؟؟

الضبع

اكثر بلد بتكرهيها ...؟؟؟

بلد غير شاكرة لنعمة الله

اى خدمة .. باى